(78) עח

א מַשְׂכִּיל לְאָסָף הַאֲזִינָה עַמִּי תּוֹרָתִי הַטּוּ אָזְנְכֶם לְאִמְרֵי־פִי
ב אֶפְתְּחָה בְמָשָׁל־פִּי אַבִּיעָה חִידוֹת מִנִּי־קֶדֶם
ג אֲשֶׁר שָׁמַעְנוּ וְנֵדָעֵם וַאֲבוֹתֵינוּ סִפְּרוּ־לָנוּ
ד לֹא נְכַחֵד מִבְּנֵיהֶם לְדוֹר אַחֲרוֹן מְסַפְּרִים תְּהִילוֹת יְהֹוָה וְעֻזּוֹ וְנִפְלְאוֹתָיו אֲשֶׁר עָשָׂה
ה וַיָּקֶם עֵדוּת בְּיַעֲקֹב וְתוֹרָה שָׂם בְּיִשְׂרָאֵל אֲשֶׁר צִוָּה אֶת־אֲבוֹתֵינוּ לְהוֹדִיעָם לִבְנֵיהֶם
ו לְמַעַן יֵדְעוּ דוֹר אַחֲרוֹן בָּנִים יִוָּלֵדוּ יָקוּמוּ וִיסַפְּרוּ לִבְנֵיהֶם
ז וְיָשִׂימוּ בֵאלֹהִים כִּסְלָם וְלֹא יִשְׁכְּחוּ מַעַלְלֵי־אֵל וּמִצְו‍ֹתָיו יִנְצֹרוּ
ח וְלֹא יִהְיוּ כַאֲבוֹתָם דוֹר סוֹרֵר וּמֹרֶה דּוֹר לֹא־הֵכִין לִבּוֹ וְלֹא־נֶאֶמְנָה אֶת־אֵל רוּחוֹ
ט בְּנֵי אֶפְרַיִם נוֹשְׁקֵי רוֹמֵי־קָשֶׁת נֶהְפְּכוּ בְּיוֹם קְרָב
י לֹא־שָׁמְרוּ בְּרִית אֱלֹהִים וּבְתוֹרָתוֹ מֵאֲנוּ לָלֶכֶת
יא וַיִּשְׁכְּחוּ עֲלִילוֹתָיו וְנִפְלְאוֹתָיו אֲשֶׁר הֶרְאָם
יב נֶגֶד אֲבוֹתָם עָשָׂה־פֶלֶא בְּאֶרֶץ מִצְרַיִם שְׂדֵה־צֹעַן
יג בָּקַע יָם וַיַּעֲבִרֵם וַיַּצֶּב מַיִם כְּמוֹ־נֵד
יד וַיְנַחֵם בֶּעָנָן יוֹמָם וְכָל־הַלַּיְלָה בְּאוֹר אֵשׁ
טו יְבַקַּע צֻרִים בַּמִּדְבָּר וַיַּשְׁקְ כִּתְהֹמוֹת רַבָּה
טז וַיּוֹצִא נוֹזְלִים מִסָּלַע וַיּוֹרֶד כַּנְּהָרוֹת מָיִם
יז וַיּוֹסִיפוּ עוֹד לַחֲטֹא־לוֹ לַמְרוֹת עֶלְיוֹן בַּצִּיָּה
יח וַיְנַסּוּ־אֵל בִּלְבָבָם לִשְׁאָל־אָכְלָם לְנַפְשָׁם
יט וַיְדַבְּרוּ בֵּאלֹהִים אָמְרוּ הֲיוּכַל אֵל לַעֲרֹךְ שֻׁלְחָן בַּמִּדְבָּר
כ הִנֵּה־הִכָּה־צוּר וַיָּזוּבוּ מַיִם וּנְחָלִים יִשְׁטֹפוּ הֲגַם־לֶחֶם יוּכַל תֵּת אִם־יָכִין שְׁאֵר לְעַמּוֹ
כא לָכֵן שָׁמַע יְהֹוָה וַיִּתְעַבָּר וְאֵשׁ נִשְׁקָה בְיַעֲקֹב וְגַם־אַף עָלָה בְיִשְׂרָאֵל
כב כִּי לֹא־הֶאֱמִינוּ בֵּאלֹהִים וְלֹא בָטְחוּ בִּישׁוּעָתוֹ
כג וַיְצַו שְׁחָקִים מִמָּעַל וְדַלְתֵי שָׁמַיִם פָּתָח
כד וַיַּמְטֵר עֲלֵיהֶם מָן לֶאֱכֹל וּדְגַן־שָׁמַיִם נָתַן לָמוֹ
כה לֶחֶם אַבִּירִים אָכַל אִישׁ צֵידָה שָׁלַח לָהֶם לָשֹׂבַע
כו יַסַּע קָדִים בַּשָּׁמָיִם וַיְנַהֵג בִּעֻזּוֹ תֵימָן
כז וַיַּמְטֵר עֲלֵיהֶם כֶּעָפָר שָׁאָר וּכְחוֹל יַמִּים עוֹף כָּנָף
כח וַיַּפֵּל בְּקֶרֶב מַחֲנֵהוּ סָבִיב לְמִשְׁכְּנֹתָיו
כט וַיֹּאכְלוּ וַיִּשְׂבָּעוּ מְאֹד וְתַאֲוָתָם יָבִא לָהֶם
ל לֹא־זָרוּ מִתַּאֲוָתָם עוֹד אָכְלָם בְּפִיהֶם
לא וְאַף אֱלֹהִים עָלָה בָהֶם וַיַּהֲרוֹג בְּמִשְׁמַנֵּיהֶם וּבַחוּרֵי יִשְׂרָאֵל הִכְרִיעַ
לב בְּכָל־זֹאת חָטְאוּ עוֹד וְלֹא־הֶאֱמִינוּ בִּנְפְלְאוֹתָיו
לג וַיְכַל־בַּהֶבֶל יְמֵיהֶם וּשְׁנוֹתָם בְּבֶהָלָה
לד אִם־הֲרָגָם וּדְרָשֻׁהוּ וְשָׁבוּ וְשִׁחֲרוּ־אֵל
לה וַיִּזְכְּרוּ כִּי־אֱלֹהִים צוּרָם וְאֵל עֶלְיוֹן גֹּאֲלָם
לו וַיְפַתּוּהוּ בְפִיהֶם וּבִלְשׁוֹנָם יְכַזְּבוּ־לוֹ
לז וְלִבָּם לֹא־נָכוֹן עִמּוֹ וְלֹא נֶאֶמְנוּ בִּבְרִיתוֹ
לח וְהוּא רַחוּם יְכַפֵּר עָו‍ֹן וְלֹא־יַשְׁחִית וְהִרְבָּה לְהָשִׁיב אַפּוֹ וְלֹא־יָעִיר כָּל־חֲמָתוֹ
לט וַיִּזְכּוֹר כִּי־בָשָׂר הֵמָּה רוּחַ הוֹלֵךְ וְלֹא יָשׁוּב
מ כַּמָּה יַמְרוּהוּ בַמִּדְבָּר יַעֲצִיבוּהוּ בִּישִׁימוֹן
מא וַיָּשֻׁבוּ וַיְנַסּוּ אֵל וּקְדוֹשׁ יִשְׂרָאֵל הִתְווּ
מב לֹא זָכְרוּ אֶת־יָדוֹ יוֹם אֲשֶׁר־פָּדָם מִנִּי־צָר
מג אֲשֶׁר־שָׂם בְּמִצְרַיִם אֹתוֹתָיו וּמוֹפְתָיו בִּשְׂדֵה־צֹעַן
מד וַיָּהָפֹךְ לְדָם יְאֹרֵיהֶם וְנֹזְלֵיהֶם בַּל־יִשְׁתּוּן
מה יִשְׁלַח בָּהֶם עָרֹב וַיֹּאכֲלֵם וּצְפַרְדֵּעַ וַתַּשְׁחִיתֵם
מו וַיִּתֵּן לַחָסִיל יְבוּלָם וִיגִיעָם לָאַרְבֶּה
מז יַהֲרֹג בַּבָּרָד גַּפְנָם וּשְׁקָמוֹתָם בַּחֲנָמַלִּים
מח וַיַּסְגֵּר לַבָּרָד בְּעִירָם וּמִקְנֵיהֶם לָרְשָׁפִים
מט יְשַׁלַּח בָּם חֲרוֹן אַפּוֹ עֶבְרָה וָזַעַם וְצָרָה מִשְׁלַחַת מַלְאֲכֵי רָעִים
נ יְפַלֵּס נָתִיב לְאַפּוֹ לֹא־חָשַׂךְ מִמָּוֶת נַפְשָׁם וְחַיָּתָם לַדָּבֶר הִסְגִּיר
נא וַיַּךְ כָּל־בְּכוֹר בְּמִצְרַיִם רֵאשִׁית אוֹנִים בְּאָהֳלֵי חָם
נב וַיַּסַּע כַּצֹּאן עַמּוֹ וַיְנַהֲגֵם כְּעֵדֶר בַּמִּדְבָּר
נג וַיְנַהֲלֵם לָבֶטַח וְלֹא פָחָדוּ וְאֶת־אוֹיְבֵיהֶם כִּסָּה יָם
נד וַיְבִיאֵם אֶל־גְּבוּל קָדְשׁוֹ הַר־זֶה קָנְתָה יְמִינוֹ
נה וַיְגָרֶשׁ מִפְּנֵיהֶם גּוֹיִם וַיַּפִּילֵם בְּחֶבֶל נַחֲלָה וַיּוֹשֶׁב בְּאָהֳלֵיהֶם שִׁבְטֵי יִשְׂרָאֵל
נו וַיְנַסּוּ וַיַּמְרוּ אֶת־אֱלֹהִים עֶלְיוֹן וְעֵדֹתָיו לֹא שָׁמָרוּ
מז וַיִּסּוֹגוּ וַיִּבְגְּדוּ כַּאֲבוֹתָם נֶהְפְּכוּ כְּקֶשֶׁת רְמִיָּה
נח וַיַּכְעִיסוּהוּ בָּמוֹתָם וּבִפְסִילֵיהֶם יַקְנִיאוּהוּ
נט שָׁמַע אֱלֹהִים וַיִּתְעַבָּר וַיְמָאֵס מְאֹד בְּיִשְׂרָאֵל
ס וַיִּטֹּשׁ מִשְׁכַּן־שִׁלוֹ אֹהֶל שִׁכֵּן בָּאָדָם
סא וַיִּתֵּן לַשְּׁבִי עֻזּוֹ וְתִפְאַרְתּוֹ בְּיַד־צָר
סב וַיַּסְגֵּר לַחֶרֶב עַמּוֹ וּבְנַחֲלָתוֹ הִתְעַבָּר
סג בַּחוּרָיו אָכְלָה־אֵשׁ וּבְתוּלֹתָיו לֹא הוּלָלוּ
סד כֹּהֲנָיו בַּחֶרֶב נָפָלוּ וְאַלְמְנֹתָיו לֹא תִבְכֶּינָה
סה וַיִּקַץ כְּיָשֵׁן אֲדֹנָי כְּגִבּוֹר מִתְרוֹנֵן מִיַּיִן
סו וַיַּךְ צָרָיו אָחוֹר חֶרְפַּת עוֹלָם נָתַן לָמוֹ
סז וַיִּמְאַס בְּאֹהֶל יוֹסֵף וּבְשֵׁבֶט אֶפְרַיִם לֹא בָחָר
סח וַיִּבְחַר אֶת־שֵׁבֶט יְהוּדָה אֶת־הַר־צִיּוֹן אֲשֶׁר אָהֵב
סט וַיִּבֶן כְּמוֹ־רָמִים מִקְדָּשׁוֹ כְּאֶרֶץ יְסָדָהּ לְעוֹלָם
ע וַיִּבְחַר בְּדָוִד עַבְדּוֹ וַיִּקָּחֵהוּ מִמִּכְלְאֹת צֹאן
עא מֵאַחַר עָלוֹת הֱבִיאוֹ לִרְעוֹת בְּיַעֲקֹב עַמּוֹ וּבְיִשְׂרָאֵל נַחֲלָתוֹ
עב וַיִּרְעֵם כְּתֹם לְבָבוֹ וּבִתְבוּנוֹת כַּפָּיו יַנְחֵם

Termina lectura para: Día 15 del mes