(52) נב

א לַמְנַצֵּחַ מַשְׂכִּיל לְדָוִד בְּבוֹא דוֹיֵג הָאֲדֹמִי וַיַּגֵּד לְשָׁאוּל וַיֹּאמֶר לוֹ בָא דָוִד אֶל־בֵּית אֲחִימֶלֶךְ
ב מַה־תִּתְהַלֵּל בְּרָעָה הַגִּבּוֹר חֶסֶד אֵל כָּל־הַיּוֹם
ג הַוּוֹת תַּחְשֹׁב לְשׁוֹנֶךָ כְּתַעַר מְלֻטָּשׁ עֹשֵׂה רְמִיָּה
ד אָהַבְתָּ רַע מִטּוֹב שֶׁקֶר מִדַּבֵּר צֶדֶק סֶּלָה
ה אָהַבְתָּ כָל־דִּבְרֵי־בָלַע לְשׁוֹן מִרְמָה
ו גַּם־אֵל יִתָּצְךָ לָנֶצַח יַחֲתְךָ וְיִסָּחֲךָ מֵאֹהֶל וְשֵׁרֶשְׁךָ מֵאֶרֶץ חַיִּים סֶּלָה
ז וְיִרְאוּ צַדִּיקִים וְיִירָאוּ וְעָלָיו יִשְׂחָקוּ
ח הִנֵּה הַגֶּבֶר לֹא יָשִׂים אֱלֹהִים מָעוּזוֹ וַיִּבְטַח בְּרֹב עָשְׁרוֹ יָעֹז בְּהַוָּתוֹ
ט וַאֲנִי כְּזַיִת רַעֲנָן בְּבֵית אֱלֹהִים בָּטַחְתִּי בְּחֶסֶד אֱלֹהִים עוֹלָם וָעֶד
י אוֹדְךָ לְעוֹלָם כִּי עָשִׂיתָ וַאֲקַוֶּה שִׁמְךָ כִּי־טוֹב נֶגֶד חֲסִידֶיךָ