(25) כה

א לְדָוִד אֵלֶיךָ יְהֹוָה נַפְשִׁי אֶשָּׂא
ב אֱלֹהַי בְּךָ בָטַחְתִּי אַל־אֵבוֹשָׁה אַל־יַעַלְצוּ אוֹיְבַי לִי
ג גַּם כָּל־קוֶֹיךָ לֹא יֵבוֹשׁוּ יֵבוֹשׁוּ הַבּוֹגְדִים רֵיקָם
ד דְּרָכֶיךָ יְהֹוָה הוֹדִיעֵנִי אֽוֹרְחוֹתֶיךָ לַמְּדֵנִי
ה הַדְרִיכֵנִי בַאֲמִיתֶךָ וְלַמְּדֵנִי כִּי־אַתָּה אֱלֹהֵי יִשְׁעִי אוֹתְךָ קִוִּיתִי כָּל־הַיּוֹם
ו זְכֹר־רַחֲמֶיךָ יְהֹוָה וַחֲסָדֶיךָ כִּי מֵעוֹלָם הֵמָּה
ז חַטּוֹת נְעוּרַי וּפְשָׁעַי אַל־תִּזְכֹּר כְּחַסְדְּךָ זְכָר־לִי אַתָּה לְמַעַן טוּבְךָ יְהֹוָה
ח טוֹב וְיָשָׁר יְהֹוָה עַל־כֵּן יוֹרֶה חַטָּאִים בַּדָּרֶךְ
ט יַדְרֵךְ עֲנָוִים בַּמִּשְׁפָּט וִילַמֵּד עֲנָוִים דַּרְכּוֹ
י כָּל־אָרְחוֹת יְהֹוָה חֶסֶד וֶאֱמֶת לְנֹצְרֵי בְרִיתוֹ וְעֵדֹתָיו
יא לְמַעַן שִׁמְךָ יְהֹוָה וְסָלַחְתָּ לַעֲו‍ֹנִי כִּי־רַב הוּא
יב מִי־זֶה הָאִישׁ יְרֵא יְהֹוָה יוֹרֶנּוּ בְּדֶרֶךְ יִבְחָר
יג נַפְשׁוֹ בְּטוֹב תָּלִין וְזַרְעוֹ יִירַשׁ אָרֶץ
יד סוֹד יְהֹוָה לִירֵאָיו וּבְרִיתוֹ לְהוֹדִיעָם
טו עֵינַי תָּמִיד אֶל־יְהֹוָה כִּי־הוּא יוֹצִיא מֵרֶשֶׁת רַגְלָי
טז פְּנֵה אֵלַי וְחָנֵּנִי כִּי־יָחִיד וְעָנִי אָֽנִי
יז צָרוֹת לְבָבִי הִרְחִיבוּ מִמְּצוּקוֹתַי הוֹצִיאֵנִי
יח רְאֵה־עָנְיִי וַעֲמָלִי וּשְׂאֵה לְכָל־חַטּוֹתָי
יט רְאֵה־אוֹיְבַי כִּי־רָבּוּ וְשִׂנְאַת חָמָס שְׂנֵאוּנִי
כ שָׁמְרָה נַפְשִׁי וְהַצִּילֵנִי אַל־אֵבוֹשָׁה כִּי־חָסִיתִי בָךְ
כא תֹּם וָיֹשֶׁר יִצְּרוּנִי כִּי קִוִּיתִיָך
כב פְּדֵה אֱלֹהִים אֶת־יִשְׂרָאֵל מִכֹּל צָרוֹתָיו