(13) יג

א לַמְנַצֵּחַ מִזְמוֹר לְדָוִד
ב עַד־אָנָה יְהֹוָה תִּשְׁכָּחֵנִי נֶצַח עַד־אָנָה תַּסְתִּיר אֶת־פָּנֶיךָ מִמֶּנִּי
ג עַד־אָנָה אָשִׁית עֵצוֹת בְּנַפְשִׁי יָגוֹן בִּלְבָבִי יוֹמָם עַד־אָנָה יָרוּם אֹיְבִי עָלָי
ד הַבִּיטָה עֲנֵנִי יְהֹוָה אֱלֹהַי הָאִירָה עֵינַי פֶּן־אִישַׁן הַמָּוֶת
ה פֶּן־יֹאמַר אֹיְבִי יְכָלְתִּיו צָרַי יָגִילוּ כִי אֶמּוֹט
ו וַאֲנִי בְּחַסְדְּךָ בָּטַחְתִּי יָגֵל לִבִּי בִּישׁוּעָתֶךָ אָשִׁירָה לַיהֹוָה כִּי גָמַל עָלָי