(128) קכח

א שִׁיר הַמַּעֲלוֹת אַשְׁרֵי כָּל־יִרְאֵי יְהֹוָה הַהֹלֵךְ בִּדְרָכָיו
ב יְגִיעַ כַּפֶּיךָ כִּי־תֹאכֵל אַשְׁרֶיךָ וְטוֹב לָךְ
ג אֶשְׁתְּךָ כְּגֶפֶן פֹּרִיָּה בְּיַרְכְּתֵי בֵיתֶךָ בָּנֶיךָ כִּשְׁתִלֵי זֵיתִים סָבִיב לְשֻׁלְחָנֶךָ
ד הִנֵּה כִּי־כֵן יְבֹרַךְ גָּבֶר יְרֵא יְהֹוָה
ה יְבָרֶכְךָ יְהֹוָה מִצִּיּוֹן וּרְאֵה בְּטוּב יְרוּשָׁלָ‍ִם כֹּל יְמֵי חַיֶּיךָ
ו וּרְאֵה בָנִים לְבָנֶיךָ שָׁלוֹם עַל־יִשְׂרָאֵל