(64) סד

א לַמְנַצֵּחַ מִזְמוֹר לְדָוִד
ב שְׁמַע אֱלֹהִים קוֹלִי בְּשִׂיחִי מִפַּחַד אוֹיֵב תִּצֹּר חַיָּי
ג תַּסְתִּירֵנִי מִסוֹד מְרֵעִים מֵרִגְשַׁת פֹּעֲלֵי אָוֶן
ד אֲשֶׁר שָׁנְנוּ כַחֶרֶב לְשׁוֹנָם דָּרְכוּ חִצָּם דָּבָר מָר
ה לִירוֹת בְּמִסְתָּרִים תָּם פִּתְאֹם יֹרֻהוּ וְלֹא יִירָאוּ
ו יְחַזְּקוּ לָמוֹ דָּבָר רָע יְסַפְּרוּ לִטְמוֹן מוֹקְשִׁים אָמְרוּ מִי יִרְאֶה־לָּמוֹ
ז יַחְפְּשׂוּ עוֹלֹתוֹת תַּמְנוּ חֵפֶשׂ מְחֻפָּשׂ וְקֶרֶב אִישׁ וְלֵב עָמֹק
ח וַיּוֹרֵם אֱלֹהִים חֵץ פִּתְאוֹם הָיוּ מַכּוֹתָם
ט וַיַּכְשִׁילוּהוּ עָלֵימוֹ לְשׁוֹנָם יִתְנוֹדוּ כָּל־רֹאֵה בָם
י וַיִּירְאוּ כָּל־אָדָם וַיַּגִּידוּ פֹעַל אֱלֹהִים וּמַעֲשֵׂהוּ הִשְׂכִּילוּ
יא יִשְׂמַח צַּדִּיק בַּיהֹוָה וְחָסָה בוֹ וְיִתְהַלְּלוּ כָּל־יִשְׁרֵי־לֵב