(41) מא

א לַמְנַצֵּחַ מִזְמוֹר לְדָוִד
ב אַשְׁרֵי מַשְׂכִּיל אֶל־דָּל בְּיוֹם רָעָה יְמַלְּטֵהוּ יְהֹוָה
ג יְהֹוָה יִשְׁמְרֵהוּ וִיחַיֵּהוּ יִבָּשֵׁר בָּאָרֶץ וְאַל־תִּתְּנֵהוּ בִּנְפֶשׁ אֹיְבָיו
ד יְהֹוָה יִסְעָדֵנּוּ עַל־עֶרֶשׂ דְּוָי כָּל־מִשְׁכָּבוֹ הָפַכְתָּ בְחָלְיוֹ
ה אֲנִי אָמַרְתִּי יְהֹוָה חָנֵּנִי רְפָא נַפְשִׁי כִּי־חָטָאתִי לָךְ
ו אֹיְבַי יֹאמְרוּ רַעָה לִי מָתַי יָמוּת וְאָבַד שְׁמוֹ
ז וְאִם־בָּא לִרְאוֹת שָׁוְא יְדַבֵּר לִבּוֹ יִקְבָּץ־אָוֶן לּוֹ יֵצֵא לַחוּץ יְדַבֵּר
ח יַחַד עָלַי יִתְלַחֲשׁוּ כָּל־שֹׂנְאָי עָלַי יַחְשְׁבוּ רָעָה לִי
ט דְּבַר־בְּלִיַּעַל יָצַק בּוֹ וַאֲשֶׁר שָׁכַב לֹא־יוֹסִיף לָקוּם
י גַּם־אִישׁ שְׁלוֹמִי אֲשֶׁר בָּטַחְתִּי בוֹ אֹכֵל לַחְמִי הִגְדִּיל עָלַי עָקֵב
יא וְאַתָּה יְהֹוָה חָנֵּנִי וַהֲקִימֵנִי וַאֲשַׁלְּמָה לָהֶם
יב בְּזֹאת יָדַעְתִּי כִּי־חָפַצְתָּ בִּי כִּי לֹא יָרִיעַ אֹיְבִי עָלָי
יג וַאֲנִי בְּתֻמִּי תָּמַכְתָּ בִּי וַתַּצִּיבֵנִי לְפָנֶיךָ לְעוֹלָם
יד בָּרוּךְ יְהֹוָה אֱלֹהֵי יִשְׂרָאֵל מֵהָעוֹלָם וְעַד הָעוֹלָם אָמֵן וְאָמֵן

Termina lectura del: Primer libro