(129) קכט

א שִׁיר הַמַּעֲלוֹת רַבַּת צְרָרוּנִי מִנּוּרָי יֹאמַר נָא יִשְׂרָאֵל
ב רַבַּת צְרָרוּנִי מִנּוּרָי גַּם לֹא־יָכְלוּ לִי
ג עַל־גַּבִּי חָרְשׁוּ חֹרְשִׁים הֶאֱרִיכוּ לַמַּעֲנִיתָם
ד יְהֹוָה צַדִּיק קִצֵּץ עֲבוֹתוֹת רְשָׁעִים
ה יֵבֹשׁוּ וְיִסֹּגוּ אָחוֹר כֹּל שֹׂנְאֵי צִיּוֹן
ו יִהְיוּ כַּחֲצִיר גַּגּוֹת שֶׁקַּדְמַת שָׁלַף יָבֵשׁ
ז שֶׁלֹּא־מִלֵּא כַפּוֹ קוֹצֵר וְחִצְנוֹ מְעַמֵּר
ח וְלֹא אָמְרוּ הָעֹבְרִים בִּרְכַּת יְהֹוָה עֲלֵיכֶם בֵּרַכְנוּ אֶתְכֶם בְּשֵׁם יְהֹוָה