(108) קח

א שִׁיר מִזְמוֹר לְדָוִד נָכוֹן לִבִּי אֱלֹהִים אָשִׁירָה וַאֲזַמֵּרָה אַף־כְּבוֹדִי
ב עוּרָה נֵבֶל וְכִנּוֹר אָעִירָה שָּׁחַר
ג אוֹדְךָ בָעַמִּים יְהֹוָה וַאֲזַמֶּרְךָ בַּלְּאֻמִּים
ד כִּי־גָדוֹל מֵעַל שָׁמַיִם חַסְדֶּךָ וְעַד־שַׁחֲקִים אֲמִתֶּךָ
ה רוּמָה עַל־שָׁמַיִם אֱלֹהִים וְעַל כָּל־הָאָרֶץ כְּבוֹדֶךָ
ו לְמַעַן יֵחָלְצוּן יְדִידֶיךָ הוֹשִׁיעָה יְמִינְךָ וַעֲנֵנִי
ז אֱלֹהִים דִּבֶּר בְּקָדְשׁוֹ אֶעְלֹזָה אֲחַלְּקָה שְׁכֶם וְעֵמֶק סֻכּוֹת אֲמַדֵּד
ח לִי גִלְעָד לִי מְנַשֶּׁה וְאֶפְרַיִם מָעוֹז רֹאשִׁי יְהוּדָה מְחֹקְקִי
ט מוֹאָב סִיר רַחְצִי עַל־אֱדוֹם אַשְׁלִיךְ נַעֲלִי עֲלֵי פְלֶשֶׁת אֶתְרוֹעָע
י מִי יֹבִלֵנִי עִיר מָצוֹר מִי נָחֳנִי עַד־אֱדוֹם
יא הֲלֹא־אֱלֹהִים זְנַחְתָּנוּ וְלֹא־תֵצֵא אֱלֹהִים בְּצִבְאוֹתֵינוּ
יב הָבָה־לָּנוּ עֶזְרָת מִצָּר וְשָׁוְא תְּשׁוּעַת אָדָם
יג בֵּאלֹהִים נַעֲשֶׂה־חָיִל וְהוּא יָבוּס צָרֵינוּ